Durant l'emprim quartal è il gudogn da concern da La Posta sa sbassà per bunamain 12% sin 130 milliuns francs, cumpareglià cun il medem temp da l'onn avant. Il resultat da gestiun è schizunt ì enavos per 17% sin 172 milliuns francs. Quai ha La Posta communitgà il mardi.
Il resultat reflecteschia las sfidas da La Posta, numnadamain la quantitad da brevs che vegnia adina pli pitschna, squitschs sin ils pretschs e sin las marschas da la logistica sco er tschains constantamain bass.
Tuttina buna basa finanziala
Er la svieuta da La Posta è sa reducida per 3% sin 1,94 milliardas francs ils emprims trais mais da l'onn. Tuttina saja la basa da las finanzas da La Posta sauna. Uschia saja il livel da l'onn passà puspè vegnì cuntanschì en ils secturs da communicaziun e da logistica. Ed er il resultat dal sectur da traffic da persunas saja restà sumegliant sco quel d'avant in onn.
RR novitads 11:00