La crisa da corona ha tutgà fermamain las Viafiers federalas. Durant l'emprim mez onn dal 2020 ha il concern da la SBB fatg ina perdita da 479 milliuns francs. Avant in onn avevan l'interpresa anc fatg in gudogn da 279 milliuns francs durant ils emprims sis mais da l'onn.
Suenter in bun start en l'onn 2020 haja il coronavirus procurà per ina ferma reducziun dals passagiers, hai gì num la gievgia a Berna ad ina conferenza da medias da la SBB. A partir dal mars sajan en media mintga di 810'000 persunas vegnidas transportadas. Quai èn pli che in terz damain ch'in onn avant. Là avevan las viafiers il mars transportà 1,29 milliuns persunas.
En consequenza sajan las entradas idas enavos marcantamain, fertant ch'ils custs per il provediment da basa sajan quasi restads tuttina er durant il lockdown.
Per il segund mez onn, spetgan las Viafiers federalas che la dumonda crescha puspè pass per pass. A media vista quinta l'interpresa dentant cun effects sin la mobilitad pervia dal coronavirus.
