Siglir tar il cuntegn

Header

cuntegn

Svizra Claude Nicollier duai cussegliar Departament da defensiun

Davart il rapport d'experts «defensiun da l'aria dal futur» duai Nicollier dar giu ses parairi. La cussegliera federala ha incumbensà l'anteriur astronaut. Concret vai per la cumpra da novs aviuns da cumbat per 8 milliardas francs.

Claude Nicollier ha 74 onns ed è astrofisicher. El è stà pilot da militar, d'aviuns da passagiers e pilot da test. Fin uss è Nicollier l'unic Svizzer ch'è stà en l'univers. Suenter ina scolaziun vasta sin la nav spaziala americana «Space Shuttle» è el sa participà a quatter missiuns en l'univers, tranter ils onns 1992 fin 1999. Oz è Nicollier commember dal «Swiss Space Center» a Losanna ed è professer a la scola politecnica da Losanna.

Segunda opiniun

Sin fundament dal rapport d'experts «defensiun da l'aria dal futur» aveva il Cussegl federal decidì da cumprar novs aviuns da cumbat ed in nov sistem da rachetas per en tut 8 milliardas francs. La proposta è vegnida da l'anteriur minister da defensiun Guy Parmelin. En la consultaziun èn quels plans dentant betg stads bainvesids.

Viola Amherd, la nova ministra dal Departament federal da defensiun, protecziun da la populaziun e sport, vul laschar analisar il project avant che manar enavant quel. Perquai datti uss in'analisa interna ed ina segunda opiniun externa. Pir lura vul ella preschentar ina proposta concreta al Cussegl federal. Quai è planisà per l'emprima mesadad dal 2019. Il rapport da Nicollier duai dar fin l'avrigl 2019.

RR novitads 17:00

Artitgels legids il pli savens