L'adopziun da la figliastra duai esser pussaivla a tuttas relaziuns da pèrs, independent dal stadi civil u da l'orientaziun sexuala.
L'adopziun communabla d'uffants esters resta dentant scumandà a pèrs omosexuals. Ina moziun correspundenta dal Cussegl dals Chantuns è vegnì mitigià dal Cussegl naziunal.
Dar geniturs als uffants
La ministra da giustia Simonetta Sommaruga ha discurrì d’ina modernisaziun moderada dal dretg d’adoptar. Il principal saja il bainstar da l’uffant. L’intent da la lescha d’adopziun stoppia en emprima lingia esser da procurar per geniturs per uffants senza geniturs.
A las adversarias ha Sommaruga ditg da considerar, ch’in na a la lescha na possia betg impedir ch’uffants creschan si tar pèrs da medema schlattaina. Quai capitia uschia ni uschia. Da debattar saja sulettamain, schebain quests uffants fissan segirads en il cas da la mort da l’agen bab u da l’atgna mumma.
RR novitads 11:00