Tenor il giudicament dal WWF na survegn nagin dals chantuns svizzer ils predicat «responsabel» pertutgant la politica dal clima da bajetgs. Sulet il chantun Basilea Citad cuntanscha la segund'auta categoria e survegn il predicat «engaschà» en il rating. Il Grischun tutga tar ils chantuns «bloccads».
Ils possessurs da chasas vegnian stimulads memia pauc per sanar energeticamain lur bajetgs crititgescha il WWF. 11 chantuns hajan realisà tenor l'organisaziun da l'ambient sulet las pretensiuns minimalas e survegnan uschia be il predicat «bloccà» (tranter quests er il Grischun). In zic meglier statti en 14 ulteriurs chantuns che survegnan il predicat «tardivant».
Il rating da chantuns
Avrir la boxSerrar la box
Il WWF ha laschà examinar sin lur politica da clima en connex cun sanaziuns da bajetgs tut ils chantuns entras l'interpresa da cussegliaziun EBP Svizra SA. Las mesiras èn vegnidas giuditgadas sin fundament da sis indicaturs: da las finamiras da clima, sur prescripziuns per energias regenerablas fin la promoziun finanzialas.
En la sparta bajetgs èn ils chantuns responsabels per la protecziun dal clima ed els possian decider bunas mesiras. Il chantun Basilea Citad haja per exempel directivas innovativas per energias regenerablas en connex cun midar il stgaudament, uschia scriva il WWF.