En il chantun Argovia hai dà in cler resultat da 67,9% Na cunter l’iniziativa per la protecziun dal clima. Lantschà quella aveva in comité da la sanestra e dals verds. L’iniziativa vuleva ina lescha d’energia chantunala pli severa. L’idea era da dar annualmain sustegn per almain trais pertschient dals bajetgs – per far renovaziuns energeticas vi da quels.
Il parlament da l’Argovia aveva praticamain fatg ina cuntraproposta. Ils deputads e las deputadas han augmentà il program per la promoziun energetica per radund 50 milliuns francs
Constituziun dal Vad pli verda
Il chantun Vad ha decidì da francar en la constituziun la protecziun dal clima e da la biodiversitad. Cun 62,7% da las vuschs è in’iniziativa chantunala dals verds e dals Giuvens verds vegnida approvada. La regenza ed il cussegl grond avevan proponì in Gea – entant che la PPS dal Vad è stada la suletta partida cunter.
L’iniziativa pretenda, ch’il chantun e las vischnancas daventan fin l’onn 2050 neutrals al CO2. Questa obligaziun vala era per las cassas da pensiun da dretg public, per la Banca chantunala vadaisa e per l’interpresa Romande Energie.
Dapli sustegn en la Turgovia
Il suveran ha decidì d’abolir il cunfin maximal da 22 milliuns francs l'onn per il fond d’energia chantunal. Quai lubescha da metter a disposiziun dapli daners per projects energetics. La decisiun en favur dal fond d’energia è crudà cun 62,4% da las vuschs.
Grazia ad in segund Gea po il chantun duvrar 127 milliuns francs, che derivan da la privatisaziun parziala da la Banca chantunala da la Turgovia. Quels èn tranter auter previs per projects d’energia e per projects culturals.
Surstar fa en vista a questas decisiuns chantunalas, ch'il Turgovia ha ditg Na a la Lescha federala davart la protecziun dal clima. Il resultat è dentant stà stretg, cun ina maioritad da Na da 50,7%.
Congedi per geniturs – in Gea ed in Na
Il chantun Genevra introducescha sco emprim chantun da la Svizra, in congedi per geniturs da 24 emnas. Tut las 45 vischnancas dal chantun han ditg Gea a l’iniziativa dals verdliberals, cun ina maioritad da 57,9% da las vuschs.
Auter il chantun Berna, là ha il suveran refusà ina sumeglianta iniziativa dals socialdemocrats cun ina maioritad da dus terzs. L’idea era d’introducir in congedi da geniturs da 24 emnas, accessoric al congedi federal per mammas e babs.