Ils animals e las plantas en las Alps svizras èn per gronda part surdumandads cun il stgaudament dal clima. Els s'adatteschian tuttavia a las novas circumstanzas, però memia plaun. A questa conclusiun vegn in studi da l'Institut federal per la perscrutaziun da guaud, naiv e cuntrada WSL.
Dapi il 1970 saja il clima en las Alps svizras per radund 1,8 grads pli chaud. Per reagir sin quai stuessen flora e fauna fugir en regiuns pli autas per 60 fin 70 meters d'autezza mintga decenni. Quai na gartegia betg a las pli bleras spezias.
Plantas e chaglias dumognan tenor il WSL 33 meters per decenni. Els èn uschia pli svelts che utschels, felesch (fletga) e tschertas spezias da bulieus cun 15 meters per decenni. Amfibis e libellas na sa muventian insumma betg perquai ch'els dovran lieus cun bler aua durant il stadi da larva.
