Dapi l'entschatta da las mesiraziuns n'èsi anc mai stà usche chaud en l'Europa sco l'onn passà. Quai rapporta il servetsch meteorologic per la midada dal clima Copernicus ch'è il pli impurtant program per l'observaziun da la Terra da l?UE.
Guardà sur l'entira Europa hai dà tenor ils experts durant l'entir onn temperaturas chaudas sur la media. Bain n'han las temperaturas en media da las singulas stagiuns rut nagins records. Sur l'entir onn haja l'Europa dentant gì ses pli chaud onn, quai stgars avant ils onns 2014, 2015 e 2018. En Svizra è il 2019 però stà be il tschintgavel chaud onn.
Temperaturas da record sin mintga continent
Er marcantamain pli chaud ch'en la media dals onns 1981 fin 2010 èsi stà en l'Alaska e grondas parts da l'Arctis. Bunamain sin tut ils continents èn vegnidas mesiradas temperaturas pli autas che la media, quai surtut en l'Europa da l'Ost e dal Sid, en l'Africa dal Sid ed en l'Australia. Be en parts dal Canada han ins registrà temperaturas sut la media.
Sco consequenza da las chaliras è er la concentraziun da CO2 creschida. Ils experts da Copernicus discurran da signals alarmants.
RTR novitads 17:00