Siglir tar il cuntegn

Header

cuntegn

Clima social Consequenzas socialas da pandemia èn preoccupantas

Las consequenzas socialas che la pandemia ha, èn tenor l'epidemiolog Marcel Salathé preoccupantas. Quellas fetschian entant dapli quitads che las consequenzas per la sanadad, ha ditg Salathé en ina intervista cun las gasettas da Tamedia.

Legenda: Marcel Salathé fa dapli quitads per las consequenzas socialas che quellas da sanadad pervi da la pandemia. Keystone

La glieud na gughegia betg pli da discutar davart la vaccinaziun e da tegnair ora discurs tar ils quals ins n'è betg dal medem avis. Amicizias giajan dapart, famiglias sa disptian ed il clima politic daventia adina pli toxic. Quai saja in svilup fitg privulus. Talas tendenzas na svaneschian betg simplamain uschia.

Couchepin appellescha a tratgs cuminaivels

L'anteriur cusseglier federal da la PLD, Pascal Couchepin ha appellà en in'intervista cun la «Schweiz am Sonntag» che la Svizra duai sa regurdar da sias fermezzas e metter ils tratgs cuminaivels en il center.

Legenda: Pascal Couchepin vul che las cuminaivladads survegnan puspè dapli pais. Keystone

Opiniuns contradictoricas duain ins esser abel d'exprimer senza metter nà tschella persuna sco traditur u in main bun patriot. Suenter la Segunda guerra mundiala hajan Svizras e Svizzers manà debattas fitg cuntraversas, senza guardar in sin l'auter sco inimis.

La raschun en quest svilup vesa Couchepin tar ils problems che sajan daventads adina pli cumplex en il mund dad oz. I saja pli grev da chapir is connex. En tals muments tendeschian ins da vesair l'atgna opiniun sco la vardad.

RTR novitads 08:00

Artitgels legids il pli savens

Scrollar a sanestra Scrollar a dretga