La cussegliera federala Simonetta Sommaruga ha prendì part ad in inscunter a Londra cun passa 40 autras ministras e ministers da l’ambient. L’occurrenza ha servì sco preparaziun per la conferenza davart il clima da l’ONU il november che vegn. Sommaruga è tranter auter s’engaschada per che tut ils pajas vegnian perina davart reglas unitaras – hai num en ina communicaziun da la Confederaziun. Ins stoppia nizzegiar ils proxims mais enfin la conferenza davart il clima – ha scrit la cussegliera federala sin Twitter. La glieud enturn il globus spetgia che sias regenzas frainian a moda effectiva il stgaudament dal clima.
Il president designà da la conferenza dal clima da l'ONU, Alok Sharma, ha appelà als partenaris da discurs internaziunals da discutar avertamain davart la politica dal clima. Ils participants als discurs da preparaziun na duain avair nagina tema d'elavurar differentas opiniuns.
Inscunter il november
A Glasgow duai avair lieu il november la conferenza mundiala dal clima Cop26 suenter che la conferenza ha stuì vegnir spustada l'onn passà pervi da la pandemia.