Clom d'agid 147 - dapli dumondas tar tema suicidi

L'onn passà han uffants e giuvenils telefonà 160'000 giadas al numer 147, l'agid e la cussegliaziun gratuita da la Pro Juventute. Las dumondas en connex cun suicidi èn s’augmentadas per 50 pertschient dapi il 2011.

Ina giuvna che telefonescha. Bild in Lightbox öffnen.

Legenda da maletgs: Tschertgar agid empè da cumbatter sulet. Il clom d'agid 147 porscha ad uffants e giuvenils in'ureglia. Keystone

Mintga di telefoneschan dus fin trais giuvenils cun dumondas seriusas davart il tema suicidi e per part cun l'intenziun concreta, scriva la Pro Juventute. Il 2011 aveva quai dà 617 dumondas, il 2015 953.

Dapli intervenziuns da crisa

In ferm augment da dumondas ha la Pro Juventute er constatà davart problems persunals (2015: 22,9 pertschient da tuttas dumondas, 2011: 15,5 pertschient). Uffants e giuvenils han cunzunt tematisà malsognas psichicas e depressiuns, disturbis da mangiar e crisas persunalas.

Era s'augmentadas marcantamain èn las intervenziuns da crisa. Il 2011 ha il numer 147 clamà 27 giadas l'ambulanza, la polizia u ils servetschs psichiatrics, il 2015 è quai stà 94 giadas. En quests cas era la vita u la sanadad d’in uffant u d’in giuvenils periclitada acutamain.

Amur e sexualitad: agid en la rait

Il numer 147 han giuvenils duvrà damain davart il tema sexualitad ed amur. 15,2 pertschient da tuttas dumondas eran il 2015 davart la sexualitad (2011: 22,4 pertschient). L’amur ha muntà a 10,6 pertschient dal dumber total da dumondas (2011: 14,8). Sco la Pro Juventute scriva, tschertgan ils giuvenils para l’emprim agid en la rait.

Il visavi saja dentant vinavant in factur impurtant. Betg adina possian respostas generalas gidar tar grevs problems persunals. Ozendi paria quai dentant d’esser pli normal ed acceptà da tschertgar agid, scriva l’organisaziun. Quai saja in segn ch’ils giuvenils sappian nua ir per l’agid.

RR novitads 11:00