Siglir tar il cuntegn

Svizra CN: Lantschà debatta davart iniziativa d'autodeterminaziun

Sco gia en il Cussegl dals chantuns na vegn l'iniziativa da la Partida populara svizra era betg a chattar ina maioritad en il Cussegl naziunal.

Magdalena Martullo e Roger Köppel en la sala dal Cussegl naziunal.
Legenda: Ils parlamentaris da la pps han gì bleras dumondas als parlamentaris da tschellas partidas mo era als agens. Keystone

La debatta ha cumenzà cun votums engaschads e passiunads. Surprendentamain ha il cusseglier naziunal Gerhard Pfister da la PCD retratg ses project per ina cuntraproposta che leva francar en la constituziun la uschenumnada «pratica da Schubert». Quella di ch’il Tribunal federal sto tractar prioritarmain ina nova lescha federala avant in contract statal sch’il legislatur ha explicitamain decidì che quai duai esser uschia.

Decidì n’ha il Cussegl naziunal anc nagut. La debatta vegn cuntinuada proxima mesemna. Passa 80 parlamentaris èn s’inscrits sin la glista d’oraturs, passa la mesadad da la PPS.

Tge che l'iniziativa pretenda

L'iniziativa d'autodeterminaziun «Schweizer Recht statt fremde Richter» vul francar che la Constituziun federala vala en mintga cas avant il dretg internaziunal ed è da resguardar avant lez. Excepziun fissan sulettamain las definiziuns obligantas dal dretg internaziunal.

Tar in conflict stuessan Confederaziun e chantuns adattar ils contracts dal dretg internaziunal a las prescripziuns da la Constituziun federala. Sche las contractivas giessan da la glatscha giu, stuess il contract che cuntrafa a la Constituziun vegnir visà. Obligaziuns dal dretg internaziunal che cuntrafan a la Constituziun na pudess la Confederaziun betg pli surpigliar u acceptar.

RR actualitad 12:00