Tenor la lescha stoppia il patrun u la patruna dar liber las usitadas uras u dis per absenzas curtas u extraordinarias. Latiers tutgan tranter auter er termins tar ina media u in medi. Sco il magazin «Beobachter» scriva vinavant en il dossier davart dumondas da dretg da lavur, duain ins però fixar quels termins sche pussibel en il temp liber u a l'ur d'in servetsch da lavur. Insatge auter valia natiralmain per termins medicinals urgents.
Tge che quai munta concret per il termin da vaccinar, possian ins interpretar sin differentas modas, scriva il Beobachter. En il Grischun vegnia vitiers, ch'ins survegnia tut tenor a curta vista in termin. Il pli savens n'èsi betg pussibel da giavischar il termin che va a prà cun l'agenda persunala.
Paja per il temp dal termin da vaccinar?
La finala datti anc la dumonda, sch'ins è pajà per il temp ch'ins dovra per il termin da vaccinar. Tenor il «Beobachter» n'è er quella dumonda betg sclerida en la lescha. Per regla sajan talas absenzas pajadas per persunas ch'han ina paja dal mais, però betg per persunas ch'èn pajadas l'ura.