Siglir tar il cuntegn

Header

In client al spurtegl da la posta, cun cedel da pajament e cudischet.
Legenda: Ils cedels da pajament da colur svaneschan. Keystone
cuntegn

Co e cum Nov cedel da pajament alv

Dapi passa 100 onns vegn pajà en Svizra cun cedels da pajament. Pia ina tradiziun, dentant betg il futur. Davent dals 30 da zercladur svaneschan ils cedels da pajament cotschens ed oranschs plaunsieu, da nov datti in cedel alv cun in code QR.

Enfin uss devi dus sistems da pajament en Svizra, quel da las bancas e quel da la posta. Ils dus sistems lavuravan cun differentas normas, quai ch’era cumplitgà e chaschunava custs. Uss datti mo pli in sistem da pajament cun ils cedels alvs. Quai sistem è il medem sco quel da l’Uniun europeica, el promova la transparenza e gida uschia da cumbatter il lavar daners tschufs.

Pli simpel cun il code QR

Il cedel da pajament alv cuntegna in code QR. Cura che quel vegn fotografà s’avra il quint digital sin il computer cun tut las indicaziuns necessarias. Ins na sto betg pli inditgar l'adressa, il numer da referenza ed il numer da conto internaziunal. Cun in clic è il pajament fatg.

Pajament al spurtegl vinavant pussaivel

Per la part da la populaziun che n’è betg s’endisada cun la digitalisaziun, datti vinavant la pussaivladad da far il pajament al spurtegl. L’onn passà èn anc adina passa 11% da tut ils pajaments vegnids fatgs al spurtegl.

RTR actualitad 11:00

Artitgels legids il pli savens

Ir a sanester Ir a dretg