Siglir tar il cuntegn

Header

Dunna stritga paintg sin in toast.
Legenda: Sch'ins less ch'il paintg resta loms.. ..lura èsi impurtant da na betg prender el memia savens ord la frestgera e puspè metter anen. Keystone
cuntegn

Co e cum Paintg n’è betg simplamain paintg

Tranter paintg da cuschinar, paintg spezial e paintg ord groma da scharun datti grondas differenzas dal gust e da l'aroma sco er da la consistenza.

Il paintg preferì da Svizras e Svizzers è tenor l’institut da perscrutaziun Agroscope, paintg cun groma aschentada, declera Walter Bisig, expert per paintg tar Agroscope, envers Radio SRF.

Paintg per cuschinar

Il paintg per cuschinar è il pli bunmartgà e quel che nus cumprain era il pli savens, conferman ils grossists Migros e Coop envers SRF. L’avantatg dal paintg da cuschinar saja, ch'ins possia duvrar el per differentas chaussas: cuschinar, far pettas ubain per stritgar sin il paun.

Paintg spezial

Sch'ins veglia paintg ch'ins dovria cunzunt mo per stritgar sin il paun, lura cumpria blera glieud pischada speziala ch'è pli loma. E là sajan las reglas pli severas che tar la paintg da cuschinar, declera Peter Ryser da la organisaziun professiunala «Paintg» envers Radio SRF:

Paintg spezial vegn adina producì frestg cun groma da latg. Pli vegls ch’in paintg è e pli fitg ch’el perda l'aroma ed il gust.
Autur: Peter Rysigmainafatschenta da l'uniun spezialisada «Paintg»

Las differenzas

En il paintg spezial hai be groma frestga da la Svizra. Percunter po il paintg da cuschinar cuntegnair groma da l’exteriur u esser stà schelà avant che vegnir en il regal. E lura datti tranter auter anc paintg da chascharia. Quest paintg vegn fatg ord groma da scharun. Scharun u era scotga, è il liquid che resta enavos, sch'ins fa chaschiel.

Il gust

Sco Peter Ryser ha gia ditg: Pli frestg ch’il paintg è – pli intensiv è ses gust. Dentant datti anc auters facturs ch'influenzeschan il gust, declera Walter Bisig dad Agroscope:

Er il pavel da las vatgas po avair ina influenza. Sch’ins pavla dapli pastg ed ervas èn l’aroma e la colur dal paintg pli intensivs.
Autur: Walter Bisigspezialist per paintg tar Agroscope

Uschia haja il paintg d'alp il pli intensiv gust, perquai che las vatgas pasculeschian là be pastg ed ervas frestgas. Ma er tar la consistenza dal paintg datti differenzas: Dapli pastg ed ervas che las vatgas mangian e meglier ch'i giaja da stritgar el sin il paun.

Ed anc in tip: Sch'ins vul, ch’il paintg resta pli ditg lom, lura èsi impurtant da betg trasora prender el ord frestgera e puspè metter anen. Pertge quella midada da temperatura fa vegnir pli dir il paintg.

RTR Co e cum 11:00

Artitgels legids il pli savens

Scrollar a sanestra Scrollar a dretga