En noss mund che daventa adina pli digital, datti adina dapli cunfruntaziun cun criminalitad da cyber. Il pli savens emprovan ils criminals da vegnir tar datas sensiblas ed infurmaziuns persunalas cun e-mails ubain sms. Talas attatgas vegnan numnadas «phishing»; sco il pled di ir a pestga. Pia bittar ora ina lantscha en la rait digitala e spetgar fin ch'in pesch morda. Ch'ins na duai betg simplamain cliccar sin links d'adressas dubiusas ch'ins n'encunuscha betg è enconuschent.
Cas extraordinari : «Phishing» a moda analoga
La pli nova «mascha» per vegnir tar datas persunalas vegn en stgaffa da brev. SRF Espresso ha survegnì pliras annunzias da persunas che han survegnì brevs da phishing, propi a la moda e maniera «veglia» sin palpiri en stgaffa da brevs. Las bres èn idas a la clientella da la Postfinance e paran da far ina parita autentica; squitschà sin palpiri da buna qualitad, francà correct ed er la lingua è fin sin in pitschen sbagl grammatical correct. Fa propi l'impressiun che la brev vegnia vairamain da la Postfinance. Quantas persunas ch'èn s'annunziadas n'ha la Postfinance betg pudì dir. La Postfinance admonescha uss sin sia pagina d'internet da las brevs da phishing.
Igl è extraodinari che talas acziuns da cugliunaria vegnan fatgas cun brevs. Er la polizia chantunala da Turitg ch'è responsabla per la plattafurma cybercrime police.ch ha confermà envers SRF Espresso, ch'els n'hajan anc mai gì in cas da phishing cun brevs. Cugliunar per posta enconuschian ins plitost en il connex cun gudogns da lotto ubain iertas da parantella u enconuschents ritgs falsifitgads.
Tge vegn pretendì en la brev?
En il messadi en la brev che na vegn betg da la Postfinance, vegn pretendì ch'il access per l'e-banking stoppia vegnir reactivà. Perquai duajan ins fotografar il code da QR stampà en la brev u suandar al link inditgà.
Co reagir?
Tgi che ha survegnì ina tala brev che cuntegna per part er la numera da la Postcard, a lez recumonda la Postfinance da laschar bloccar la carta e remplazzar quella. En cas da dubis, duajan ins en mintga cas drizzar al survetsch per ils clients da la Postfinance. Ed uschigliò: En nagin cas reagir sin la brev e betg suandar las instrucziuns da la brev. E tgi che ha gia fotografà il code da QR u è ì sin la pagina d'internet dal link inditgà duai s'annunziar tar il survetsch per ils clients e far ina denunzia tar la polizia.
