In fund schelà, igl è stgir ed ins sto spert ir en biro. Quai èn cundiziuns privlusas, in accident è spert capità. Surtut tranter las 06:00 e las 08:00 la damaun schabegian las crudadas il pli savens.
150 milliuns francs custs d’accidents
En emprima lingia surprenda la segiranza d’accidents ils custs. 150 milliuns francs l'onn sajan quai en Svizra. Ma in cas da responsabladad da terzas o terz po la segiranza dumandar enavos ils raps. Quai vala surtut pro cas da negligientscha greva: Sche la via n’è betg vegnida rumida u memia pauc bain ed il accident avess pudì vegnir evità: lura è la possessura u il possessur dal terren responsabel. Quai pon esser persunas privatas, dentant er la vischnanca che sto lura pajar.
Er qua vegn tenor la SUVA differenzià. Sch’i naiva tut la notg na sto la naiv betg esser rumida gia la damaun a las 07:00. Suenter in di e mez stuess la via dentant esser libra.
Responsabel po er esser il pedun o la peduna
Senza buns chalzers na stuessan ins betg ir sin ina via glischa – betg mo pervia dal privel d’accidents. Lura na paja numnadamain er nagina persuna terza ils custs da l’accident. Sper la schelta da chalzers èsi er impurtant da planisar avunda temp per il viadi.