Siglir tar il cuntegn
Inhalt

Svizra Co surviva la PBD senza Eveline Widmer-Schlumpf

Suenter la demissiun da la cussegliera federala Eveline Widmer-Schlumpf giaja quai uss quasi per «il surviver da la Partida burgais-democratica», di il politolog Georg Lutz.

Cussegliera federala Eveline Widmer-Schlumpf en discurs cun il president da partida Martin Landolt.
Legenda: Cussegliera federala Eveline Widmer-Schlumpf en discurs cun il president da partida Martin Landolt. Keystone

La PBD perda sia pli impurtanta figura d'identificaziun. «Ella sto sa profilar cun agens temas», di il politolog Georg Lutz. «A bleras persunas n’èsi numnadamain betg cler co che la partida sa differenzieschia dad autras partidas dal center.» Na grategia quai betg, lura haja la partida grev da surviver, uschia Lutz.

Politolog Georg Lutz
Legenda: georgLutz.ch
La partida è vegnida ad in punct critic, quai che pertutga ses avegnir.
Autur: Georg Lutzpolitolog

Problem da persunal

In auter problem per la PBD saja da recrutar persunal che sa stentia per la partida. Quai funcziunia bain anc en ils chantuns Grischun e Berna, nua che la partida saja francada e derasada bain. «Insatgi cun ambiziuns sin in post executiv elegia en il rest da la Svizra, in'autra partida che la PBD, ina partida pli gronda», di Georg Lutz. «Quai cun la speranza d'avair uschia meglras schanzas.»

PBD perda sia attractivitad

Vul pia dir che la PBD perda zic a zic sia attractivitad. La partida saja vegnida ad in punct critic, quai che pertutgia ses avegnir.

Quai avessia la PBD pudì evitar l'onn passà tras ina reuniun cun la Partida cristiandemocrata (PCD), constatescha il politolog Georg Lutz. Suenter la ruschnada a dretga tar las elecziuns naziunalas e las partidas dal center politic ch'han stuì laschar plimas è el da l'opiniun che las partidas dal center ston baud ni tard reagir e collavurar pli stretg u schizunt fusiunar.

Landolt è optimistic

Il president da la PBD, Martin Landolt ha entant punctuà envers radio SRF che la partida na saja betg senza muntada. En vista a las elecziuns dal 2019 saja impurtant da collavurar anc meglier cun la PCD e tut segund er cun ils verdliberals. La partida vegnia a cumbatter anc pli fitg, uss che la cussegliera federala Eveline Widmer-Schlumpf haja annunzià sia retratga.