En general partan var dus terzs da las Svizras e dals Svizzers dal fatg ch’i saja pussaivel per famiglias da viver sco ch’els giavischan. Ina minoritad da 27% na parta betg questa opiniun. Da realisar la famiglia sco ins giavischa para d'esser meglier pussaivel en la Svizra latina (75% en la Svizra franzosa manegian ch'i saja cumplainamain u plitost pussaivel e 78% en la Svizra taliana) ch'en la Svizra tudestga (69%).
En la retschertga han ins era dumandà suenter ils divers concepts e las differentas ideas pertutgant las famiglias. Ils resultats conferman l’avis da la maioritad ch’ins possia viver bain en Svizra sco famiglia.
Sin critica frunta la tgira dals uffants: Quella vegn considerada sco impurtanta per l’egualitad dals dretgs da la dunna ed a medem temp sco memia pauc sviluppada. Ina clera maioritad è pia er da l’avis che l’egualitad cumpletta da las schlattainas na saja anc betg cuntanschida en Svizra (60%). Tar las dunnas è questa opiniun cleramain pli preschenta (75%) che tar ils umens (45%).
I dat anc da far…
Tut en tut sa mussa en la retschertga ch’i dat anc da surmuntar, sin via a l’egualitad cumpletta da las schlattainas, tscherts champs problematics ed ina part considerabla da disfidanza. Uschia è ina clera maioritad da 78% cumplainamain u plitost da l’opiniun che las dunnas possian ruinar la vita d'in um cun abus sexuals inventads. La quota da quellas persunas ch'èn cumplainamain d'accord cun questa decleraziun è pli auta tar ils umens che tar las dunnas (82% èn cumplainamain u plitost d'accord cun quai – cumpareglià cun 74%).
Ha la midada en las rollas da las schlattainas fatg pli grev la vita per ils umens? Ina leva maioritad relativa da 49% n'è plitost u insumma betg da quest avis, ma 46% èn cumplainamain u plitost perencletgs. Er qua vala, betg surprendentamain: Ils umens èn pli cleramain da quest avis che las dunnas, e las persunas dumandadas pli veglias plitost che las giuvnas.
La Svizra latina s’exprima pli ferm che tuttina bleras dunnas sco umens duessan esser en posiziuns da cader, en tut las organisaziuns (68% dals francofons èn cumplainamain u plitost da quest avis e 65% dals italofons, ma be 45% dals germanofons). Pli bassas che las entradas èn, e pli fitg ch'ils dumandads sustegnan questa pretensiun: Tar entradas dal tegnairchasa da CHF 3'000 u damain din 65% gea cumplainamain u plitost gea, tar entradas da CHF 7'000 u dapli, be 48%.
Il maletg tradiziunal da la rolla da la dunna vegn renvià d’ina clera maioritad da las persunas interrogadas. Tuttina èn imaginaziuns che cuntradin als ideals emancipatorics evidentas. Uschia chattan 37% ch'ina dunna vegn numnada ina schletta mamma sch'ella lavura ordaifer l’atgna famiglia. Las dunnas èn cleramain pli fitg da quest avis ch’ils umens (49% vs 26%).
24% chattan cumplainamain u plitost, che la societad svizra stess tut en tut meglier, sche dapli dunnas restassan a chasa tar lur uffants. 30% chattan cumplainamain u plitost, che dunnas na duessan betg purtar vestgadira averta, sch'ellas na vulan betg attenziun nungiavischada.