«Cartais Vus ch'ils uffants dad oz pon crescher si cun uschè paucs quitads sco nagina generaziun d'uffants avant els?». Be 26% da las Svizras e dals Svizzers han respundì cumplainamain u plitost gea a questa dumonda, 7% damain che l'onn passà. E 71% èn da l'opiniun ch'il temp, durant il qual ins pudeva viver en Svizra senza quitads, è passà e ch'i va be pli engiu cun il mund.
Quai che pertutga l'avegnir èn las aspectativas da la populaziun svizra aifer in onn daventadas pli pessimisticas. Quai mussa la gronda retschertga d'opiniuns «Co vai, Svizra?» che l'institut gfs.berna ha realisà per la segunda giada per incumbensa da la SRG SSR. 51'000 persunas han fatg part e respundì var 300 dumondas davart tut ils aspects da la vita
Cuntentezza en il mument
Igl è il cuntrast tranter l'uss e l'avegnir che croda en egl en ils resultats da la retschertga. Quai che pertutga la vita dad oz en Svizra è la valitaziun per gronda part positiva: 59% da las persunas interrogadas din ch'ellas sajan cuntentas cun lur vita (nota 8 fin 10 sin ina scala dad 1 fin 10). Malgrà ch'ils custs da viver èn creschids en cumparegliaziun cun l'onn precedent, din anc adina dus terzs da las persunas ch'ellas resentian lur situaziun finanziala mo in zic u insumma betg sco engrevgianta.
«Per ina clera maioritad en Svizra èn ils quitads finanzials in problem dal qual ch'ins ha be udì», di Urs Bieri da gfs.berna. Tuttina resentan 35% lur situaziun finanziala sco plitost u fitg engrevgianta. E lur part è s'augmentada levamain.
Lur cuntentientscha survegnan las persunas dumandadas en emprima lingia da la vita privata. Cun lur vita da lavur èn ellas anc in zic pli malcuntentas che l'onn passà. Igl èn surtut il stress ed il tempo che fa quitads al plaz da lavur. 83% chattan, adina dapli glieud saja surdumandada, 11% dapli che l'onn avant. 58% din ch'i giaja meglier ad els sch'els lavurian pli pauc.
Temas da perder la bainstanza
Entant ch'i regia il mument in sentiment fundamental positiv, predominescha la sceptica en vista a l'avegnir. Be 14% crain ch'i giaja economicamain meglier cun els durant ils proxims onns. 37% quintan schizunt cun il cuntrari, las premias da las cassas da malsauns che s'augmentan èn il quità principal dals interrogads. Ma era il tema guerra occupa pli fitg che l'onn passà, tant sco la segirtad ed il terrorissem.
«Quai èn temas da sperditas che sa manifesteschan qua», di Urs Bieri da gfs.berna. «Nus essan sin in nivel fitg aut, ed ins tema che quai na giaja betg vinavant en l'eternitad.»
Auter che quai che la schleppa electorala dals Verds da las elecziuns da l'atun passà han laschà supponer, è la midada dal clima per dus terzs da las persunas dumandadas anc adina in problem serius, nua ch'igl è necessari d'agir directamain. Sin la dumonda ferm discutada, tge che la Svizra duai far cunter la midada dal clima è per 72% dals dumandads l'avis: reducir las emissiuns a l'intern dal pajais e betg sustegnair projects per reducir las emissiuns a l'ester.
