Il manader da project en la sparta indrizs electrics duai avair surdà las 604 incumbensas a duas firmas ed el sco era las firmas hajan profità da quai. Capità saja quai tranter ils onns 2003 enfin 2014. Fatg public il cas han las gasettas «Tages Anzeiger» e «Der Bund». Tschentà quint haja l'um tar omaduas firmas per en tut 1,8 milliuns. Las lavurs na sajan dentant per gronda part betg vegnidas fatgas. Entras quai ha la Viafier federala in donn d'almain 1,2 milliuns francs.
La Viafier federala cumpara sco accusader privat avant dretgira. La procedura penala cumenza ils 5 da zercladur. Per la procedura èn previs trais dis ed in di sco reserva.
Codex da cumportament dapi il 2015
Sin dumonda da l'agentura da novitads svizra ha la Viafier federala declerà ch'els hajan gia fatg bler ils ultims onns. I dettia per exempel in post per annunziar cas da fraud. Dapi il 2015 datti reglas liantas pertutgant il codex da cumportament che regleschan per exempel tge regals u donaziuns che pon vegnir acceptads u betg ed era auters avantatgs, sco era tuttas furmas da corrupziun.
La Viafier federala mettia gronda paisa ch'ils collavuraturs sa cuntegnian endretg e sa tegnian en il mintgadi vid las prescripziuns. Els stoppian sa tegnair vid autas premissas eticas. Per exempel stoppia mintga cumpra da passa 1'000 francs vegnir autorisada da la centrala per cumpras.
RR novitads 11:00