En cunvegnientscha cun la partenaria Trenitalia curseschan ils trens en in'emprima fasa cun tschintg trens dad Eurocity tras il Gottard, da Turitg u Basilea a Milaun respectiv da Milaun en Svizra. Quai correspunda ad ina capacitad da radund 50%. L'avust duai quai lura vegnir bajegià ora. A partir dals 7 da settember duai lura puspè l’entira purschida esser a disposiziun. Tranter auter er la colliaziun quotidiana da la Svizra a Venezia.
Sin il traject dal Simplon curseschan a partir dals 29 da zercladur quatter trens directs en omaduas direcziuns, mintgamai dus da Genevra via Losanna e dus da Basilea via Berna a Milaun. In ulteriur pass da schlargiar la capacitad è lura previs ils 7 da settember. Tranter avust e settember è il traject interrut tranter Iselle e Domodossola, quai pervi da lavurs da construcziun.
Il concept da protecziun resta tenor las Viafiers federalas dentant tuttina – en l’Italia vala per exempel per tut ils passagiers in’obligatori da purtar mascras.