Siglir tar il cuntegn

Header

cuntegn

Svizra Colliaziuns pli spertas e bigliets pli chars

Il nov urari dals 11 da december na porta betg mo novas purschidas, cun il tunnel dal Gottard sa reducescha er il temp da viagiar tranter la Svizra tudestga ed il Tessin per radund ina mes'ura.

En il center da la midada da l'urari da quest onn stat il Gottard. Da nov vegnan tut ils trens sperts manads tras il tunnel da basa. L'anteriur traject dal Gottard vegn nizzegià per il traffic da lavur e turissem.

Pitschnas midadas tar la viafier retica

Las midadas da l'urari tar la viafier retica pertutgan la Surselva. Il tren che parta las 18.25 uras da Cuira cursescha da nov betg pli mo enfin Glion, mabain enfin a Mustér – e quai mintga di. Plinavant datti ina colliaziun supplementara la saira las 22.20 uras davent da Mustér a Cuira - medemamain mintga di. Persuenter vegn il tren las 19.03 uras da Glion a Cuira stritgà, pervia da frequenzas memia bassas. Quai ha la Viafier retica confermà sin dumonda dad RTR.

Il pretsch per l'abunament grischun BÜGA crescha en media per 1,2%. Per persunas creschidas custa el da nov 1730 francs per la 2.classa - quai èn 40 francs dapli.

Pretschs creschan per l'entira Svizra

Cun la nova purschida creschan er ils pretschs da bigliets tar la Viafier federala. Singuls bigliets da l'emprima u segunda classa s'augmentan per 2,5%, ils pretschs per ils abunaments generals per passa 4%. Sin ils ulteriurs trajects datti be paucas midadas per il traffic da persunas. Latiers sa tracti en emprima lingia da novas colliaziuns, ulteriuras fermadas, optimaziuns da l'urari.

Las midadas:

  • grazia al nov tunnel dal Gottard vegn il viadi tranter il nord ed il sid da la Svizra per 30 minutas pli spert
  • abunament general crescha per 205.-
  • auters tickets custan tranter 2,4% (carta dal di) fin 9% (pass da velo)
  • il nov urari vala a partir da dumengia ils 11 da december

RR novitads 11:30

Artitgels legids il pli savens