Siglir tar il cuntegn

Header

cuntegn

Svizra Collisiun sin lingia dal Gottard - in mort

l traject da la viafier che maina sur Lucerna vers il tunnel dal Gottard è serrà suenter ina collisiun da tren.

Tar lavurs da mantegniment durant la notg sajan dus vehichels da construcziun collidads tranter Immensee ed Arth-Goldau. Sco quai che la polizia communitgescha, haja quest accident custà la vita ad in lavurer da 54 onns. In segund lavurer è vegnì blessà mez grev.

Entras la collisiun sajan ils dus trens sviads, uschia ch'ils binaris dad omadus vials sajan vegnids donnegiads fermamain. Quant grond ch'il donn è saja grev da stimar, uschia las Viafiers federalas.

Ils dus trens da construcziun eran sin la via enavos da lavurs da mantegniment. In dals trens è charrà en il segund tren che steva airi. Sin fundament da las defurmaziuns dals chars saja da quintar ch'il tren aveva ina spertadad relativamain auta, uschia ha ditg in pledader da l'SBB. Era betg cler è daco ch'il segund tren è stà airi sin il traject.

Il traject tranter Immensee ed Arth-Goldau restia serrà enfin gievgia endamaun. Betg pertutgads da questa interrupziun saja la colliaziun tranter Turitg sur il Gottard en il sid.

RR novitads 09:00

Artitgels legids il pli savens