La collavuratura da l'ambassada svizra en la Sri Lanka ch'era vegnia arrestada, è puspè vegnida laschada liber sin cauziun. Il Departament federal da l'exteriur EDA, ha confermà in rapport da l'agentura da novitads AP. Ins saja levgià da la decisiun da la dretgira.
La collavuratura locala da l'ambassada svizra aveva ditg ch'ella saja vegnida rapinada la fin da november a Colombo. Nunenconuschents hajan sfurzà ella da tradir infurmaziuns. La Sri Lanka dubitescha però quai ed ha perquai instradà inquisiziuns encunter la dunna – ella è stada en arrest d'inquisiziun.
RTR novitads 17:00