Siglir tar il cuntegn
audio
Commentari dad Adrian Camartin
Or da RTR Audio dals 09.06.2024. Maletg: RTR
laschar ir. Durada: 1 minuta 28 Secundas.

Commentari La Svizra sto producir dapli electricitad

La Svizra sto producir dapli electricitad. Quel simpel fatg han tant ils aderents sco era las adversarias renconuschì durant il cumbat da votaziun. E quai po era esser la raschun principala pertge ch’ina clera maioritad ha oz ditg Gea a la lescha d’electricitad. I dat simplamain nagin’alternativa vul la Svizra daventar neutrala areguard il CO2 fin il 2050. Mo cun il di dad oz n'è la chaussa anc betg liquidada. Quai che sto suandar è in bun tant pli pretensius che da metter la brev cun ils cedels da votar en l’urna.

La lescha d’electricitad sco tala producescha numnadamain gnanc ina suletta ura kilowatt electricitad dapli. I dovra investiziuns e decisiuns prudentas en las vischnancas, tant en las regiuns muntagnardas sco en la bassa, sch’i va per indrizs solars, rodas da vent u ovras idraulicas. Plinavant dovri ussa era ina midada da mentalitad, e quai tar ina buna part da la populaziun.

Igl è bunamain ina banalitad: La pli favuraivla electricitad è quella che na vegn betg duvrada. Spargnar electricitad è pli simpel che blers manegian e va era senza perder confort. Il resultat cler per la lescha d’electricitad duai perquai esser motivaziun da reponderar l’agen agir – igl è la fin finala per il bun da tuts.

Adrian Camartin

Adrian Camartin

Correspundent Chasa federala

Avrir la boxa da profil Serrar la boxa da profil

Adrian Camartin rapporta per RTR da Berna. Sco correspundent persequitescha el la politica naziunala, quai vul dir decisiuns dal Cussegl federal e debattas dal Parlament federal. El rapporta dentant era en general da temas svizzers ed en spezial dals Rumantschs en la Bassa.

RTR novitads 18:00

Artitgels legids il pli savens