Siglir tar il cuntegn

Header

audio
Saira: Commentari da Adrian Camartin
Or da Actualitad dals 20.09.2017.
laschar ir. Durada: 1 minuta 24 Secundas.
cuntegn

Svizra Commentari - Per ina Svizra da las minoritads

Il Tessinais è ì cun la plima. Noss chantun vischin ha pia puspè in represchentant en il Cussegl federal a Berna. In di da festa per il Tessin. Ma betg sulet per lez. Era nus en il Grischun dastgain senz'auter esser cuntents e loschs da quell'elecziun.

Cun Ignazio Cassis daventa numnadamain in um cusseglier federal che sa tge ch'i munta da viver en ina regiun periferica, che sa tge ch'i munta esser ina minoritad, da stuair sa defender e sa giustifitgar cunter ils gronds.

El veglia megliurar il barat e la collavuraziun tranter las minoritads, ha el ditg. Avair in'ureglia averta per ils problems che sajan avant maun.

Naziun fundada sin pluralitad

La Svizra saja ina naziun fundada sin la voluntad, ina naziun che saja battida ord da la diversitad linguistica e culturala. El veglia esser il fravi che batti ensemen anc pli ferm la naziun, ha ditg Cassis.

La quintessenza da la libertad saja per el da respectar las opiniuns d'auters. Da proteger quella libertad vegni ad esser si'incumbensa sco cusseglier federal.

Bels pleds, pleds che fan bain a l'olma. Pleds als quals i ston uss suandar ils fatgs. Quai è cler. Jau sun dentant da buna speranza che betg mo il Tessin mabain era il Grischun, e qua betg mo las vals italofonas, mabain era la Rumantschia, han en el in ambassadur fidaivel a Berna.

RR actualitad 17:00

Artitgels legids il pli savens