Siglir tar il cuntegn

Header

cuntegn

Commerzi cun animals en privel Berset: «Respostas fermas ed urgentas»

Las aspectativas dal cusseglier federal Alain Berset a la 18avla conferenza èn cleras: Il minister da l’intern svizzer spetga «respostas fermas ed urgentas» per mantegnair la biodiversitad sin il planet. Berset ha avert a Genevra la 18avla conferenza davart il commerzi internaziunal cun animals, ch’èn en privel da vegnir extirpads.

Privel tras frauduladers – e chastis massa pauc severs

En ses discurs ha Alain Berset admonì da frauduladers ed il commerzi illegal cun animals e plantas. Per cumbatter quel commerzi saja quai necessari da lavurar ensemen internaziunalmain.

En pli dovria quai leschas pli severas. Berset ha rendì attent ad ina proposta dal Cussegl federal, che vul chastis pli severs per tgi che fa commerzi illegal cun animals e plantas protegidas.

La conferenza tracta 57 dumondas da protecziun

Fin als 28 d’avust discutan 183 pajais commembers co proteger plantas ed animals periclitads dal commerzi illegal. Tranter auter vegn pretais ina meglra protecziun per giraffas, antilopas-saiga, squals-mako u rajas-violina. Discussiuns cuntraversas vegnan spetgadas davart il commerzi cun ivur dad elefants e cornas da rinoceros.

Svizra cun proposta davart peschs exotics

Dal mandat da tractativas svizzer resortan ils puncts da paisa da la Confederaziun. Uschè veglia la Svizra savair dapli dal commerzi cun peschs da mar e tge che quai signifitga per ils auters peschs en il mar.

Allevar peschs da mar è fitg difficil. Perquai vegnan tschiffads ils peschs selvadis senza prender resguard sin els u sin lur ambient da vita. Blers dals tschiffads crappan avant che rivar en ils aquariums privats.

RR novitads 12:00+

Artitgels legids il pli savens