Las midadas tecnologicas e da la societad influenzeschan fermamain la branscha da fotografia en Svizra. In dals gronds problems per la branscha è la concurrenza en l'internet: La cumpart online dal martgà da fotografias munta actualmain a radund 50%.
Gian Giordano, manader da «FotoPro Ganz» a Turitg pleda d’in «murir da fatschentas spezialisadas». E l’associaziun da la branscha «ImagingSwiss» ha ils ultims 10 onns pers la mesadad da lur commembers, uschia il president Alex Mächler. Oz dumbra l’associaziun anc 140 firmas.
Internet e telefonins èn la gronda concurrenza
Il pli grond problem per la branscha fotografica è la concurrenza en l’internet. Cumprar apparats ed accessoris da fotografia en l’internet è uschè popular sco anc mai. Cunzunt ils grossists Migros e Coop sa duelleschan en il spazi virtual cun lur purschidas da Digitec resp. Microspot.
Uschia èsi er problematic che la branscha è anc adina fitg dependenta da hardware, pia dals apparats sezs. In auter trend che vegn vidlonder è che telefonins stgatschan adina pli fitg ils apparats da fotografia tar amaturs – grazia a la qualitad da maletgs vegn adina meglra.
Diversifitgar e s’unir
Las fatschentas spezialisadas reageschan differentamain sin ils gudogns che van enavos. Uschia han intginas fatschentas dà si totalmain lur servetschs da labor. Ellas emprovan da sa tegnair sur l’aua cun fittar apparats, occasiuns, reparaturas, accessoris, ma er cun curs e viadis da foto.
In’autra strategia mussa l’associaziun «FotoPro»: Dapi il 1996 èn s’unidas 11 fatschentas da foto. Uschia pon ellas marcar ina pli ferma preschientscha sin il martgà e realisar megliers pretschs da cumpra.
RR novitads 12:00