Dapi il november 2016 custan satgs da plastic tar Coop e Migros 5 raps. Dapi lura è il consum dals satgs sa reducì per 80%. Motiv per quest regress saja main il pretsch, mabain ch'ils satgs custian insumma insatge. «La glieud mida ses sa cuntegnair, cura ch'insatge n'è betg pli gratuit», di la redactura d'economia da SRF Denise Joder-Schmutz.
Entrass il regress spargna il Coop radund 850 tonnas plastic nov ad onn. Quai è dentant damain che 1% dal plastic che chasadas svizras dovran ad onn. Tar la Migros vegnian ils satgs entant producids ord plastic reciclabel. Per quest motiv datti er naginas indicaziuns tar l'interpresa per con ch'il con consum è sa reducì.
Midada da tenuta
Sco ch'i para emprovan adina dapli persunas da desister dal tut sin satgs da plastic. Tant il Coop sco er la Migros han constatà in regress da fin a 30% tar ils satgs da plastic per legums. Plinavant han ils grossists observà che consumentas e consuments dumondan adina dapli suenter satgs da palpiri.
Per ils paucs producents, che fan satgs da plastic en Svizra, è il regress tar il consum dentant marginals. Intgins dad els produceschian però er da nov cun materials alternativs sco palpiri e plastic reciclabel.
RR novitads 16:00