Il detaglist saja tenor communicaziun, sa cunvegnì cun ils partenaris socials d’augmentar la summa da las pajas per fin ad 1%. En il center stettian las pajas minimalas e las pajas da referenza che duajan vegnir unifitgadas ed augmentadas. Ulteriuras adattaziuns succedian a moda individuala. Il Migros ha augmentà la paja minimala sin 4’100 francs.
Detaglists svizzers han vendì dapli il settember
Cumpareglià cun il settember da l’onn avant sajan las svieutas dal commerzi en detagl s’augmentadas nominal per 1,9% – quai ha communitgà l’Uffizi federal da statistica. Il sectur da mangiativas, bavrondas e products da tubac saja però sa reducì per 1,6%. Il sectur da «Non-Food» haja nudà in plus da passa 3%.
Chareschia creschida durant l'october
La chareschia annuala en Svizra è puspè creschida durant l'october – ella era tar in plus dad 1,2 % – suenter ch'ella è stada il settember tar plus 0,9% – ha communitgà l'Uffizi federal da statistica. Cunquai è la chareschia annuala creschida l'october, per l'emprima giada dapi trais onns sin dapli che 1%. La raschun principala è ch'ils pretschs d'energia èn s'augmentads. Ieli da stgaudar, gas e carburant han custà dapli. Pli pauc han ins da l'autra vart pajà per salata e legums.
