Il discounter Denner ha fatg l’onn passà ina svieuta da record. Quella saja s’augmentada per 1,3 pertschient sin 3,8 milliardas francs. Quai ha communitgà Denner. Davart il gudogn n'ha Denner fatg naginas indicaziuns.
Augment grazia a products frestgs
Da contribuir saja quest resultat tranter auter a la purschida da products frestgs che saja vegnida engrondida. La frequenza da clientella è s'augmentada per 2,3 puncts procentuals. Cun las schluccadas da las restricziuns da corona saja il cumportament da cumpra sa normalisà.
Passa 6'000 collavuraturas e collavuraturs
Denner haja stgaffì radund 300 novas plazzas da lavur l’onn passà. En tut lavurian en las 580 filialas e 270 manaschis partenaris passa 6'000 persunas, tranter quels 130 emprendists per il discounter. Ultra da quai ha Denner augmentà la summa da la paja per 1 pertschient. La nova paja minimala munta a 4'200 francs.