L'avrigl han Svizras e Svizzers cuntinuà da cumprar dapli mangiativas e bavrondas. Tenor l'Uffizi federal d'agricultura han las stizuns vendì 20% dapli victualias che l'avrigl avant in onn. L'augment saja da declerar cun las ustarias serradas ed era che las cumpras sur cunfin n'eran betg pussaivlas.
S'augmentà marcantamain sajan las cumpras da products frestgs sco verdura, fritga, ovs e charn. Cumpareglià cun l'onn passà hajan ins cumprà 30% dapli puma e 40% dapli legums.
Betg pudì cumpensar sminuziun da la gastronomia
L'auta dumonda da charn en il commerzi en detagl n'haja dentant betg pudì cumpensar la sminuziun ch'i ha dà entras las gastronomia ch'è stada serrada. Quai en spezial tar la charn-bov e la charn-vadè. Dumbers da record hai era da tar ils ovs damai che Pasca è stà durant l'avrigl. Là sajan ins circa vegnì da cumpensar la differenza da quai che ha mancà entras la gastronomia.
La dumonda enorma per farina saja puspè sa stabilisada l'avrigl, suenter ch'i aveva dà cumpras da panica durant la segunda mesadad dal mars.