La gruppa Volg ha fatg l'onn passà quasi usché bler svieuta sco l'onn avant. Vul dir 1,76 milliardas francs (-0,6%). Il directur da la gruppa «Volg» Philipp Zgraggen n'è però betg propi sa mussà dischillusiunà. Ins n'haja betg quintà da pudair surpassar las svieutas extraordinarias da l'onn passà, ha ditg Zgraggen. Il 2020 aveva la gruppa registrà ina svieuta da 1,77 milliardas francs – quai ch'era lura 15,4% dapli ch'il 2019. I saja in bun signal che las svieutas sajan quasi sin medem nivel.
Homeoffice e blers che fan vacanzas en Svizra
Sco quai che la gruppa Volg communitgescha saja quest bun resultat tranter auter era d'attribuir al homeoffice ed al fatg che blers hajan fatg vacanzas en Svizra. Quatras sajan las fatschentas idas bain en vischnancas e vitgs. La gruppa ha però era augmentà sia rait da butias. Actualmain cumpiglia la gruppa 927 butias
Tuttina hajan las butias als tancadis registrà meglieras fatschentas che las butias en las vischnancas. Las butias en vischnancas hajan fatg svieuta dad 1,33 milliardas francs (-2,2%), entant che las butias da tancadis han auzà al svieuta sin 343 milliuns (+4,6%).