Il concern d'energia Axpo ha l'onn da gestiun 2018/19 (per la fin da settember) pudì augmentar il gudogn sin 865 milliuns francs. In onn avant aveva il concern anc realisà in gudogn da 131 milliuns francs. Quai ha il pli grond concern d'energia da la Svizra communitgà la mesemna.
Profità ha l'Axpo en spezial d'in grond gudogn da revalitaziun. En vista a l'augment spetgà dals pretschs sin il martgà d'energia europeic, haja il concern augmentà en la contabilitad ils implants da producziun. Be da quai resultia gia in gudogn da 400 milliuns francs, scriva l'Axpo.
Tut ils secturs da fatschenta da la gruppa hajan realisà buns resultats. La fatschenta da commerzi haja fatg in resultat da record, surtut grazia al success cun contracts cun cumpraders d'energia a lunga vista. Las investiziuns en energia regenerabla e la digitalisaziun lubeschian da crescher en futur en Svizra ed internaziunal, scriva il concern.
Ord l'archiv da SRF:
La fin da november ha la Tagesschau rapportà ch'il concern d'energia Axpo planiseschia ses emprim implant solar grond.
RTR novitads 09:00