La nova concessiun duai lura ir en vigur l’onn 2019, e valair fin che la nova lescha davart las medias electronicas planisada è pronta. Cun la nova concessiun veglia il Cussegl federal clerifitgar il profil da l’incumbensa da prestaziun da la SSR, communitgescha l’Uffizi federal da communicaziun. Uschia duaja vegnir pli cler il caracter dal service public da la SSR.
Betg perder ils giuvens
La nova concessiun duai tenor il Cussegl federal era resguardar aspects d’in rapport da l’onn passà. Ina finamira duai esser da cuntanscher ils giuvens e las giuvnas che na dovran savens betg pli las medias classicas. Ulteriurs puncts èn da segirar las infurmaziuns e las prestaziuns culturalas, sco era dapli sforzs per l’integraziun. La concessiun revedida va en consultaziun publica la fin da quest onn.
RR novitads 12:00