- La SBB e la BLS vulan collavurar en il futur tar il traffic a lunga distanza naziunal
- Las Viafiers federalas vulan ord quest motiv sistir lur plant cunter ina decisiun dal Uffizi federal da traffic
Tranter la SBB e la BLS datti discurs per ina collavuraziun tar il traffic a lunga distanza naziunal en il futur. Tenor ina communicaziun da las Viafiers federalas dettia gia dapi in per emnas discurs constructivs tranter las duas partidas. Tant la viafier Bern-Lötschberg-Simplon sco er las Viafiers federalas quintan anc da chattar durant il terz quartal da quest onn ina schliaziun.
En quest connex vul la SBB uss sistir la procedura davart il plant da las Viafiers federals cunter ina decisiun dal Uffizi federal da traffic.
Dispita per lingias da tren
Il zercladur dal 2018 aveva l'Uffizi federal da traffic surdà las duas lingias per il traffic interregiunal Berna-Bienna e Berna-Burgdorf-Olten a la BLS. La gronda cumpart da las lingias da tren a lunga distanza aveva dentant la SBB survegnì.
Tuttina ha la SBB en consequenza discutà dad ina midada da sistem ed ha purtà plant cunter la surdada da las concessiuns.
RR novitads 14:00