Las stizuns da la chadaina da chasas da refurma «Müller» ston serrar – tenor atgnas indicaziuns ha il cussegl administrativ deponì la bilanza. Pertutgadas dal concurs èn 298 collavuraturas e collavuraturs en 37 lieus, conferma l'interpresa rapports da medias. Las butias han vendì mangiativas ed artitgels dal mintgadi or da producziun biologica.
Pretsch e pandemia han spaventà consuments
Tenor ina communicaziun da l'interpresa è il pretsch vegnì adina pli impurtant per la clientella. I haja savens dà reclamaziuns en connex cun quel. Lura haja la pandemia purtà midadas en il cumportament da consumar, cun disas novas sco homeoffice e butias online.
Tenor l'interpresa sto la branscha da chasas da refurma gia cumbatter dapi il 2016 cun ina reducziun dal gudogn. La reducziun successiva n'ha la chadaina er betg pudì franar suenter la pandemia. Uss sto ella serrar las portas. Las pajas ed ils tschains èn tenor la chadaina pajads fin il december 2022.
Fin da la firma suenter passa 90 onns
Cun quai finescha l'istorgia da la chadaina. 1929 aveva Rudolf Müller avert l'emprima filiala a Turitg ch'è ils ultims onns stada la pli gronda chasa da refurma da la Svizra. Las 37 filialas da l'interpresa èn repartidas sin la Svizra tudestga ed il Tessin, ina datti a Cuira.
Oz, mardi, èn las butias anc avertas in ultim di.
