La Confederaziun sto spargnar, e quai betg memia pauc. Tenor la ministra da finanzas, cussegliera federala Karin Keller-Sutter, sto il budget federal vegnir reducì ils proxims onns per 4 milliardas francs. La tschinta duajan serrar tuttas e tuts, er ils purs. Concret propona il Cussegl federal da reducir las contribuziuns a l'agricultura l'onn proxim per radund 60 milliuns. Plinavant pudessan ils proxims quatter onns vegnir stritgads ulteriurs 400 milliuns francs.
La puraglia svizra sa dosta cunter quellas mesiras da spargn da la Confederaziun. Dapi 20 onns restian stabilas las expensas per l'agricultura sin 3,6 milliardas francs entant che las expensas da la Confederaziun sajan s'augmentadas per bunamain 40 milliardas francs. Ultra da quai saja la situaziun finanziala da bleras famiglias purilas gia oz tendida. In rapport dal Cussegl federal è vegn a la conclusiun che puras e purs gudognian en media be gist 17 francs l'ura.
Tuts – betg be l'agricultura
Agricultura na saja betg il sectur ch'ha laschà crescher il budget da la Confederaziun ils davos onns. Quai conceda Michele Salvi, econom tar il lavuratori d'ideas Avenir Suisse. Ma er tar ils purs dettia potenzial da spargnar ed i saja impurtant da duvrar ils daners da taglia uschè effizient sco pussaivel. Quai na capitia en l'agricultura dentant betg adina. El chapeschia che las branschas pertutgadas da las mesiras da spargn sa dostan. Qua na sajan ils purs nagina excepziun. Ma ins stoppia schon guardar in zichel pli exact sin ils arguments che vegnan preschentads. La situaziun finanziala dals purs na saja per exempel betg dapertut tuttina.
Il mument tracta il Parlament federal las mesiras da spargn. Bain pusseivel che las duas chombras fan anc adattaziuns. En la sessiun d'enviern duai il preventiv per l'onn proxim vegnir decidì definitivamein.