Il minister d’educaziun Johann Schneider-Ammann vul evidentamain auzar las pretensiuns sin la via a la matura.
Critica envers cumpensaziun da notas
Las premissas per dumagnar ils examens duain tenor in rapport da la «NZZ am Sonntag» vegnidas adattadas. Quai mussa in scrit dal Departament per economia, educaziun e perscrutaziun per mauns da la Conferenza svizra da las directuras e dals directurs chantunals da l’educaziun publica (CDEP): «En general ston las reglas vegnidas adattadas uschia ch’igl è pli grev da cumpensar mancanzas en ils roms principals», citescha il figl ord il messadi.
En il visier da la Confederaziun sajan maturands cun prestaziuns manglusas en matematica ed en la lingua primara, hai num vinavant. Quests scolars possian oz levamain cumpensar schlettas notas cun bunas notas en auters roms.
Scolas autas sa lamentan
Tenor indicaziuns da la gasetta sa lamentan las universitads «gia daditg sur da cumpetenzas manglusas en ils roms principals». Il president da la conferenza da las scolas autas, Michael Hengartner, beneventa perquai il postulat da Berna: Dar dapli paisa a matematica e tudestg haja in effect da signal.
La CEDP vul sa fatschentar dal tema, sco il president Christoph Eymann di: La conferenza da las scolas autas e la CEDP sajan sa cunvegnids d’evaluar ensemen las normas existentas.
RR novitads 06:00