Siglir tar il cuntegn

Header

cuntegn

Conferenza da medias Trais emnas situaziun extraordinaria

Il dumber da cas da corona confermads en Svizra è creschì dapi ier per 1000.Tenor las cifras da l’Uffizi federal da sanadad datti actualmain var 20’300 cas confermads. Sonda ha l'Uffizi per sanadad publica infurmà en in livestream davart la situaziun actuala.

19 milliuns mascras da protecziun disponiblas

Tenor Daniel Koch vegnian las pli bleras mascras anc cumpradas en l'exteriur. L'inventari da mascras da 19 milliuns saja dentant relativ aut. Vinavant sa chattian tranter quellas quatter milliuns mascras da FFP. Las mascras vegnan reartidas als chantuns ed ils spitals.

Dapli che 7600 tests per di

Ier hajan ins en l'entira Svizra fatg 7660 tests. Quai saja ina cifra remartgabla, uschia Daniel Koch. La capacitad maximala saja bler pli auta, ma i dat anc memia paucs test-kits.
Ins guardia er sin la relaziun da tests fatgs ed ils tests positivs. L'augment da cas confermads ch'ins ha uss na sajan betg sfalsifitgads tras dapli tests.

4900 schuldads en servetsch

Al 20avel di en acziun tira brigadier Raynald Droz bilantscha. Per incumbensas da sanitat e sergirtad sajan 4900 schuldads en acziun. 1300 schuldads lavuran en spitals, uschia Droz, ed i vegnian adina dapli. Ins haja dumondas da 324 spitals, 100 da quellas sajan anc pendentas.

Ultra da quai èn er 5000 persunas da la protecziun civila en servetsch. Ils pli blers en il Tessin e la Svizra franzosa.

«Restai a chasa, per plaschair»

La media da vegliadetgna dals mortoris saja tar 83 onns, uschia Koch. 97% dals mortoris sajan stadas persunas cun malsongnas e sintoms preexistents.

Las gruppas vulnerablas da populaziun sajan vivanant da protegir. I saja fitg impurtant da betg infectar els. Perquai supplitgescha Daniel Koch anc ida giada da restar a chasa. Spezialmain ir a lieus visitads è d'evitar.

Be in pitschen dumber da persunal da tgira è infectà.

Sin dumonda quantas persunas da tgira che s'hajan infectà cun il coronavirus ha Daniel Koch dà ina resposta: Be 2.6% da las persunas en la tgira e medischina sajan ospitalisads, in pitschen dumber. Quants ch'èn infectads propi e sajan a chasa na possian ins betg eruir.

Infurmà han

  • Daniel Koch, delegà dal BAG per Covid-19
  • Marie-Gabrielle Ineichen-Fleisch, secretaria da stadi, SECO
  • Christoph Flury, vizedirectur Departament federal da defensiun, protecziun da la populaziun e sport,
  • Raynald Droz, Brigadier, schef da stab commando operatiuns, VBS

RTR novitads 15:00

Artitgels legids il pli savens

Ir a sanester Ir a dretg