Il Cussegl federal propona al parlament da metter a disposiziun ulteriurs 90 milliuns per l'agid umanitar en il Proxim Orient. Cun ils daners vul el sustegnair en l'Israel, en ils territoris palestinais ed en ils pajais vischins surtut las differentas organisaziuns da la Crusch cotschna e Mesaglina cotschna, sco er la ONU. Era organisaziuns nunguvernamentalas internaziunalas activas en il sectur umanitar duain survegnir daners, sco ch'il Cussegl federal ha communitgà mesemna.
Cussegl federal è inquietà
Cusseglier federal Ignazio Cassis ha ditg avant las medias che la situaziun umanitara en questa regiun saja «ordvart inquietanta». En la Strivla da Gaza saja la situaziun «catastrofala». Il Cussegl renconuschia il dretg da l'Israel da defender. El fa endament che omaduas partidas sajan obligadas da proteger la populaziun civila e da resguardar il dretg internaziunal umanitar.
I dovra pausas da fieu umanitaras u in armistizi per pussibilitar l'access a bains d'agid e per proveder la populaziun.
