Siglir tar il cuntegn

Header

cuntegn

Conjunctura Luna dals consuments sa pegiurescha vinavant

La luna da consumentas e consuments svizzers è sa pegiurada vinavant en il segund quartal. Pervi da la tema da la chareschia valiteschan els lur situaziun finanziala sco istoricamain negativa. Il martgà da lavur vegn percunter valità meglier.

Il fanadur è l'index per la luna dals consuments crudà sin -41,7 puncts. Per l'emprima giada è il nivel cun quai crudà perfin pli profund che suenter la pandemia da corona (-39 puncts), scriva il Secretariat da stadi per economia, Seco.

Per l'ina spetgan ils consuments temps economics pli grevs. L'index parzial davart il svilup general da l'economia per ils proxims 12 mais è danovamain sa sbassà ed è cun -53 puncts lunsch sut la media dals ultims onns (-9 puncts).

Per l'autra valiteschan ils perchasas a moda fitg negativa lur situaziun finanziala, scriva il Seco. L'index parzial per la situaziun finanziala dal passà giascha cun -35 puncts sin in nivel sumegliant bass sco l'entschatta dals onns 1990. L'index per la situaziun finanziala dal futur ha cun -35 puncts il stan il pli bass dapi il schaner 1995 (-26 puncts).

Situaziun dal martgà da lavur buna

Questa luna negativa na vegn dentant betg chaschunada da la situaziun al martgà da lavur. Las persunas dumandadas partan numnadamain dal fatg che lur plazzas èn segiras. Dasper la segirezza da las plazzas da lavur (-27 puncts) vegn er il svilup tar il dumber da persunas dischoccupadas (27 puncts) valitada sco marcantamain meglra che la media dals ultims onns.

Dentant teman ils consuments e las consumentas l'inflaziun. Il svilup dals pretschs pudess esser la raschun che las persunas dumandadas sa retegnan actualmain tar acquisiziuns pli grondas, hai num en la communicaziun.

La retschertga dal Seco

Avrir la box Serrar la box

La retschertga fa il Seco mintgamai ils mais schaner, avrigl, fanadur e october. Per la retschertga actuala ha il Seco dumandà 1'252 persunas.

audio
Per tadlar: las novitads da las 12:00
ord RTR Audio dals 02.08.2022.
laschar ir. Durada: 4 minutas 39 Secundas.

RTR novitads 09:00

Artitgels legids il pli savens