Pervi da la pandemia da corona èn damain persunas stadas en chasas d’attempads e da tgira l'emprim onn da la pandemia, il 2020. Tenor l’Uffizi federal da statistica è il dumber sa reducì per radund 4,1% sin 158'433 clientas e clients. Questa reducziun è la pli gronda dapi 15 onns, pia dapi che questas datas vegnan relevadas. Il dumber da las persunas che midan da nov en ina chasa da vegls è sa reducì per passa 10%. Il dumber da persunas che moran en la chasa da vegls è percunter creschì per 16,3%. En la media dals ultims tschintg onns è quest dumber però creschì mo per 0,2%.
Trend tar la tgira a chasa tras la Spitex
Persuenter han dapli persunas fatg diever da la tgira da malsauns ordaifer l’ospital. La Spitex ha tgirà a chasa 420'793 persunas – quai che munta in plus da 6,7% cumpareglià cun l’onn precedent. Tenor l'Uffizi federal da statistica tranter auter perquai che persunas evitescha chasas da tgira pervi dal risico d'infecziun. Uschia ha la Spitex purschì servetschs durant 26,5 milliuns uras.
Custs creschan vinavant
Durant l'entir onn 2020 han registrà las chasas da tgira e da vegls custs da manaschi da radund 10,8 milliardas e cun quai 2,6% dapli che l'onn avant. Las prestaziuns da la Spitex han custà total 2,8 milliardas francs; quai ch'è in plus da radund 6%. Finanziads vegnan quests custs per la gronda part (42%) dal maun public e da las assicuranzas (40%). Ina part pli pitschna (16%) han finanzià las clientas ed ils clients sezs.
