Fin la fin da schaner ston bunamain 300’000 persunas emplenir ora la consultaziun dal pievel. Questa vegn fatga mintg’onn da la Confederaziun. Tgi che survegn quest questiunari è obligà dad emplenir ora el. Dentant saja quai betg pussaivel per persunas che han in impediment da vesida, uschia era Jonas Pauchard, che raquinta sia situaziun ad SRF. Il questiunari n'è betg senza barrieras, era sche la Confederaziun avess da prender resguard sin la lescha d’egualitad per persunas cun impediment. Jonas Pauchard avess gugent prendì part a la consultaziun, surtut per quest motiv: «Persunas cun in impediment da vesida èn pertutgadas bler da dischoccupaziun. Quai po dentant betg vegnir preschentà, era sch'igl è tenor mes avis fitg impurtant.
Jau vi far questas chaussas autonom, cura e nua che jau less.
L’Uffizi federal per statisticas cusseglia al pertutgà da desister da la participaziun u tschertgar agid per emplenir or il questiunari. Atgnamain n'èsi betg in obstachel dad emplenir da quests questiunaris digitals. I dat differents agids digitals, sco per exempel l’ediziun linguistica. Dentant n'èsi per Jonas Purchard betg pussaivel dad emplenir or il questiunari da la Confederaziun, per exempel perquai ch'i n'inditgescha betg tge resposta ch'el ha dà.
Persunas che na prendan betg posiziun n'existan betg
A l’Uffizi federal per statistica è quest obstachel preschent e Jean-Paul Kauthen, il responsabel per la consultaziun, di ch’els èn vi da quest tema. I saja era in problem per la Confederaziun sch'i n'è betg pussaivel per persunas tschorvas da dar resposta al questiunari. Las persunas tschorvas che na pon betg prender part a la consultaziun n'existan lura betg en la statistica.
Nus na avain tar quai naginas cifras. Nus na savain quantas persunas en Svizra che èn pertutgadas.