- Cumpareglià cun avant 25 onns baivan mez uschè bleras persunas mintga di alcohol
- Il dumber è sa reducì da 20% il 1992 sin 11% il 2017
- Adina dapli persunas baivan dentant almain ina giada al mais sturn
- 18% da las Svizras e dals Svizzers na baiva insumma nagin alcohol
Radund 80% da la populaziun Svizra baiva alcohol. Cumpareglià cun avant 25 onns è il dumber da persunas che baivan dentant mintga di sa reducì per la mesadad. Quai mussan las pli novas cifras dal Uffizi federal da statistica.
Augment tar persunas pensiunadas
Il 2017 han 15% dals umens e 7% da las dunnas inditgà da baiver mintga di. Il 1992 era il dumber anc tar 30% dals umens e 12% da las dunnas. In sigl datti tenor il BfS tar persunas pensiunadas. 26% da las persunas sur 65 onns baivan mintga di alcohol.
Era sche damain persunas baivan mintga di alcohol è il dumber da persunas che baivan almain ina giada il mais sturn creschì. Quai cunzunt tar la giuventetgna. Là è era la differenza tranter las dunnas ed ils umes sa sminuida, vul dir las giuvnas baivan uss era pli savens sturn. Tranter il 2007 fin il 2017 è la cumpart da las dunnas da 15 fin 24 onns che baivan almain ina giada il mais sturn sa dublegiada sin 24%. Quai è anc adina pli pauc savens che ils umens. Tar ils umens en la medema vegliadetgna è la quota restada tar 30%.
Ord l'Archiv:
RTR novitads 11:00