L'indicatur per la luna dals consuments è crudà da -9 sin -39 puncts dapi il schaner. Tenor il Secretariat da stadi per l'economia SECO è quai sut il nivel che l'indicatur era durant la crisa da finanzas dal 2008/2009. Uschè bass era l'indicatur tenor il Seco la davos giada durant la crisa d'immobiglias avant 30 onns.
Pessimistic per economia, plazza ed investiziuns
Pertutgant il svilup da l'economia en general è l'index sa reducì sin in bass da record da -78 puncts. Analog è il svilup tar las spetgas per il martgà da lavur: Il dumber dals dumandads è creschì uschè fitg sco anc mai aifer in quartal (dapi ch'ins mesira el il 2007). Pegiurament hai era dà tar la segirtad da las plazzas – daplirs teman per plazzas.
Era la luna da far investiziuns pli grondas è sa reducida. L'index qua è sa reducì sin -48 puncts.
Tut che quinta cun temps difficils
La raschun èn tenor il Seco sa chapescha ils svilups enturn il coronavirus. La malsegirtad saja gronda ed il pessimissem davart il svilup da l'economia era. E la finala restrenschian las mesiras – sco butias serradas – las pussaivladads da cumprar e consumar.