Siglir tar il cuntegn

Svizra Consuments resguardan pauc ils products svizzers

Ils consuments svizzers prefereschan products da latg da producents indigens. Tar artitgels d'igiena prendan els dentant il pli savens products da fabricants da l'exteriur. Quai mussa ina retschertga che l'institut da perscrutaziun Nielsen ha fatg en 63 pajais.

Curuna en ina stizun.
Legenda: Cunzunt tar products frestgs sco chaschiel e latg miran ils Svizzers sin la derivanza indigena. Keystone

Il pli internaziunal è la cumpra tar products sco schampo ni cosmetica. Mo gist quatter pertschient dals dumandads han inditgà ch'els guardian là sin producents indigens. Cun diesch pertschient in zic pli auta è la quota tar la pasta da dents.

Tut auter è il cumportament da cumpra tar victualias. Tenor la retschertga èsi per prest trais quarts da las Svizras e dals Svizzers impurtant che chaschiel, paintg ni era latg vegnan da purs ni interpresas indigenas. Mintga terz consument mira era tar la charn schelada che quella vegnia da la Svizra.

Cumpra locala el trend

Plinavant cumprian ils Svizzers il pli gugent en stizuns localas. Bunamain 70 pertschient dals consuments cumprian fritgs e legums en butias en la vischinanza.

RR novitads 12:00