Exact 64% da las abitantas e dals abitants tranter 16 e 64 onns mettessan a disposiziun lur datas da moviment per uschia pudair persequitar retrospectiv infecziuns dal coronavirus, communitgescha l'interpresa Deloitte. 34% laschassan registrar lur datas senza resalvas, 30% fissan plitost per ina registraziun. 36% èn cunter l'uschenumnà Contact Tracing, dentant sulet 14% refusan categoricamain ina registraziun anonima dals moviments en il cumbat cunter la pandemia da Covid-19.
Tenor Deloitte paran Svizras e Svizzers dad esser durant il temp da crisa pli avert per tecnologias e schliaziuns digitalas che uschiglio. Tar ils aderents dal Contact Tracing è l'acceptanza fitg gronda. Tar persunas ord la branscha da IT munta quella a 78%. Ed er ils «digital natives» sut 30 onns èn cun 68% anc sur la media totala.
