Ils lavurers da construcziun sajan pronts da surpigliar ils custs per segirar la renta davent da 60 onns. Quai han ditg ils sindicats Unia e Syna. Percunter stoppian ils impressaris pajar in augment da las pajais endretg. Quels veglian dentant mo far quai, sch’ils sindicats traguttian diras perditas en il contract collectiv naziunal da lavur.
Tranter auter veglian ils impressaris augmentar il dumber flexibel d'uras dad oz 100 sin 300. Questas sururas na vegnian era betg pajadas. In'autra chaussa che disturba ils sindicats è l'idea dals impressaris, da pajar a lavurers pli vegls che midan plazza mo la pli bassa paja minimala per lavurants auxiliars.
Ils impressaris fan ina greva renfatscha
La Societad svizra dals impressaris constructurs reagescha cun ina communicaziun. Ils sindicats veglian laschar far pausa sur enviern ils lavurants, cun agid da l'indemnisaziun per lavur da mal'aura ord la cassa da dischoccupaziun, scriva la societad dals impressaris.
Questa «proposta scandalusa» na saja nagut auter che d'instigar da surduvrar prestaziuns socialas.
RR actualitad 12:00